Ang Natagong Kasaysayan sa Bersikulo Kwarenta - Numero Trenta’y Uno

“Kining pagkompromiso tali sa paganismo ug Kristiyanismo maoy miresulta sa pag-uswag sa ‘tawo sa sala’ nga gitagna sa tagna ingon nga mosupak ug magpataas sa iyang kaugalingon labaw sa Dios. Kadtong dambuhalang sistema sa mini nga relihiyon maoy usa ka obra maestra sa gahum ni Satanas—usa ka monumento sa iyang mga paningkamot sa paglingkod sa trono aron pagaharian ang yuta sumala sa iyang kabubut-on.” The Great Controversy, 50.

“Ang mga nangalibog sa ilang pagsabot sa pulong, nga mapakyas sa pagtan-aw sa kahulogan sa antikristo, sa pagkatinuod mopahiluna sa ilang kaugalingon diha sa dapig sa antikristo. Wala nay panahon karon alang kanato sa pagpasagol sa atong kaugalingon sa kalibotan.” Kress Collection, 105.

Mahimo bang mag-uban sa paglakaw ang duha, gawas kon sila nagkauyon? Amos 3:3.

“Sa mga kalihukan nga karon nagakahitabo sa Estados Unidos aron pagsiguro sa suporta sa estado alang sa mga institusyon ug mga pamaagi sa iglesia, ang mga Protestante nagsunod sa mga tunob sa mga papista. Labaw pa niana, ilang giablihan ang pultahan aron ang Kapapahan makabaton pag-usab sa Protestante nga Amerika sa pagkahari nga nawala kaniya sa Daang Kalibotan.” The Great Controversy, 573.

Ug ikaw, Ezra, sumala sa kaalam sa imong Dios, nga anaa sa imong kamot, magtudlo ka ug mga mahistrado ug mga maghuhukom, nga maghukom sa tanang katawohan nga atua sa tabok sa suba, sa tanan nga nakaila sa mga balaod sa imong Dios; ug tudloi ninyo kadtong wala makaila niini. Ug bisan kinsa nga dili motuman sa balaod sa imong Dios, ug sa balaod sa hari, ipatuman dayon kaniya ang hukom, bisan kini alang sa kamatayon, o sa pagpalagpot, o sa pagsakmit sa mga kabtangan, o sa pagkapriso. Ezra 7:25, 26.

Ug miingon Siya kang Abram, Hibaloi sa pagkatinuod nga ang imong kaliwatan mahimong dumuloong sa yuta nga dili ila, ug sila maga-alagad kanila; ug sila managdaugdaug kanila sulod sa upat ka gatus ka tuig; Ug usab nianang nasora nga ilang paga-alagaran, pagahukman Ko: ug sa ulahi manggula sila nga may dakung bahandi. Genesis 15:13, 14.

Ug kon dili siya matubos niining mga tuiga, nan mogula siya sa tuig sa jubileo, siya ug ang iyang mga anak uban kaniya. Kay alang kanako ang mga anak sa Israel mga sulugoon; sila mao ang akong mga sulugoon nga akong gipagula gikan sa yuta sa Egipto: Ako mao si Jehova nga inyong Dios. Levitico 25:54, 55.

“Ang pagmatuto sa batan-ong hari sa Egipto gitugyan sa Senado sa Roma kang M. Emilius Lepidus, nga nagtudlo kang Aristomenes, usa ka tigulang ug eksperyensiyadong ministro nianang sawang harianon, aron mahimong iyang magbalantay. Ang iyang unang buhat mao ang paghimo ug mga kalikayan batok sa gihulgaang pagsulong sa duruha ka naghiusa nga mga hari, si Felipe ug si Antiochus.”

“Alang niini iyang gipadala si Scopas, usa ka bantogang heneral sa AEtolia, nga niadtong panahona nag-alagad sa mga Ehiptohanon, ngadto sa iyang kaugalingong yutang natawhan aron magpatigom ug mga dugang nga kasundalohan alang sa hukbo. Human makatigom ug makasangkap sa usa ka hukbo, midulong siya sa Palestina ug Coele-Syria (samtang si Antiochus nalambigit sa usa ka gubat batok kang Attalus sa Lesser Asia), ug iyang gipailalom ang tibuok Judea sa awtoridad sa Ehipto.”

“Sa ingon niana ang mga kahimtang nahimutang aron matuman ang bersikulo nga ania sa atong atubangan. Kay si Antiochus, nga mihunong sa iyang gubat batok kang Attalus sumala sa mando sa mga Romano, nagdalidali sa paghimo ug mga lakang aron mabawi ang Palestina ug Coele-Syria gikan sa mga kamot sa mga Ehiptohanon. Si Scopas gipadala aron mosupak kaniya. Duol sa mga tinubdan sa Jordan, nagtagbo ang duruha ka mga hukbo. [Panium] Napildi si Scopas, gigukod ngadto sa Sidon, ug didto gihiktan pag-ayo sa paglikos. Tulo sa labing batid nga mga heneral sa Ehipto, uban ang ilang labing maayo nga mga kasundalohan, gipadala aron wagtangon ang paglikos, apan walay kalampusan. Sa kaulahian si Scopas, sa dihang iyang giatubang, diha sa yagpis ug dili mahikap nga anino sa gutom, ang usa ka kaaway nga dili niya arang masukol, napugos sa pagsurender ubos sa makauulaw nga mga kondisyon nga kinabuhi lamang; tungod niini siya ug ang iyang napulo ka libo ka mga tawo gitugotan sa pagbiya, nga hinubo ug walay sapot. Dinhi makita ang pag-ilog sa labing kinutaan nga mga ciudad sa hari sa amihanan; kay ang Sidon, sa iyang nahimutangan ug sa iyang mga depensa, usa sa labing malig-on nga mga ciudad niadtong mga panahona. Dinhi makita ang kapakyasan sa mga armas sa habagatan sa pagbatok, ug ang kapakyasan usab sa katawhan nga gipili sa hari sa habagatan; nga mao si Scopas ug ang iyang mga pwersang Aetolian.” Daniel and the Revelation, 257, 258.

“Ang ‘pagsulti’ sa nasud mao ang buhat sa iyang lehislatibo ug hudisyal nga mga awtoridad.” The Great Controversy, 442.

“Daghan, bisan gani niadtong nalambigit niining kalihukan alang sa pagpatuman sa Domingo, ang gibulagan sa pagtan-aw sa mga sangpotanan nga mosunod niini nga buhat. Wala nila makita nga sila nagahampak sa diretso batok sa kagawasan sa relihiyon. Daghan ang wala gayud makasabut sa mga pag-angkon sa Igpapahulay sa Biblia ug sa bakak nga patukoranan nga ginatukoran sa institusyon sa Domingo. Ang bisan unsang kalihukan pabor sa lehislasyong relihiyoso sa pagkatinuod usa ka buhat sa paghatag ug pag-uyon ngadto sa kapapahan, nga sulod sa daghang mga kapanahonan mapadayonong nakiggubat batok sa kagawasan sa tanlag. Ang pagbantay sa Domingo nakautang sa iyang paglungtad ingon nga gitawag nga Kristohanong institusyon ngadto sa ‘tinago sa kasal-anan;’ ug ang pagpatuman niini mahimong usa ka tinuod nga pag-ila sa mga prinsipyo nga mao gayud ang batong pamag-ang sa Romanismo. Sa dihang ang atong nasod mosalikway sa ingon niini sa mga prinsipyo sa iyang kagamhanan pinaagi sa paghimo ug balaod sa Domingo, ang Protestantismo niining buhata makig-uban sa poperya; kini wala nay lain kondili ang paghatag ug kinabuhi sa malupigon nga kagahum nga dugay nang matinguhaong naghulat sa iyang higayon aron mosibug pag-usab ngadto sa aktibong despotismo.” Testimonies, volume 5, 711.

“Ang sugo nga nagapugos sa pagsimba niining adlawa kinahanglan nga ipaabot ngadto sa tibuok kalibotan. Sa limitado nga kahimtang, kini miadto na sa gawas. Sa daghang mga dapit ang sibil nga gahum nagasulti uban sa tingog sa usa ka dragon, maingon gayod sa gisulti sa haring pagano ngadto sa mga Hebreohanong bihag.” Signs of the Times, May 6, 1897.